TVB版西片《戇豆先生》+《戇豆放大假》配音表

JVT

影片名稱 戇豆先生 Bean
（英國迷你短劇《戇豆先生》風靡全球之後第一次拍電影嘅嘗試，具體感想放文末）


類別 電影


首播日期 21/3/2004


重播日期 24/7/2005、8/4/2007、16/1/2021


播放頻道 明珠台


備註 1997年英國電影


配音員 角色名稱 演員

梁志達（老實講我覺得阿達真係好勁，配型男配rap配搞笑都掂）——戇豆（Rowan Atkinson飾演）
（第一男主角，倫敦皇家國家畫廊有史以嚟最唔掂嘅僱員，言行舉止神經質兼且大多數時候唔睇場合，堪稱跨海破壞王）

招世亮（招sir配哩種角色簡直駕輕就熟）——梁大衛（Peter MacNicol飾演）
（第二男主角，洛杉磯葛氏畫廊僱員，好死唔死竟然信戇豆係個藝術學者仲信到十足十，差啲搞到唔得佢死）

源家祥（已故）——葛佐治（Harris Yulin飾演）
（葛氏畫廊嘅老細，為咗迎接《惠斯勒的母親》回歸美國而交畀梁大衛負責活動事宜，箇中態度意味深長）

黃麗芳——梁雅麗（Pamela Reed飾演）
（梁大衛老婆，非常反感唔似常人嘅戇豆入住自己屋企，以至於帶埋仔女避瘟神咁避開佢）

梁少霞——梁珍妮（Tricia Vessey飾演）
（梁大衛個女，叛逆問題少女，超級唔妥老豆收留戇豆嘅做法）

曾秀清——梁奇文（Andrew Lawrence飾演）
（梁大衛個仔，鹹鹹濕濕嘅細路，雖然有時覺得戇豆幾得意，但係都唔多鍾意戇豆住自己屋企）

盧國權——Brutus（全片冇提過角色名，Richard Gant飾演）
（高階黑人警察，睇因為發神經而兩次被拉嘅戇豆非常之唔順眼，點知最後反而畀佢救番自己一命）

陳永信——柳（Burt Reynolds飾演，演員已故）
（美國將軍，《惠斯勒的母親》揭幕典禮嘉賓，懷有強烈嘅民族自豪感）

譚炳文（已故）——Walton（全片冇提過角色名，Peter Egan飾演）
（皇家國家畫廊嘅大粒佬，片頭會議主持人，開頭大大聲話要炒戇豆，畀主席窒一窒就即刻轉呔）

陳永信——艾瑪（Larry Drake飾演，演員已故）
（負責《惠斯勒的母親》嘅保安工作，但係其實佢啲保安措施對戇豆一啲用都冇）

黃鳳英——班妮（吳珊卓飾演）
（負責葛氏畫廊嘅公關工作，片頭主張搵邦祖菲嚟為《惠斯勒的母親》揭幕儀式撐場，點知畀老細foul咗）

陳永信——韓華達（Tom McGowan飾演）
（葛氏畫廊商品部經理，不過佢啲taste就真係……）

盧國權——主席（John Mills飾演）
（皇家國家畫廊主席，戇豆嘅伯樂，片頭以辭職威脅唔准炒戇豆）




影片名稱 戇豆放大假 Mr. Bean's Holiday
（某種意義上算係前作嘅續集，不過同前作冇直接關聯兼且搞破壞嘅地方由美國變成法國，具體感想放文末）


類別 電影


首播日期 7/8/2011


重播日期 8/4/2012、21/4/2013、23/1/2021


播放頻道 明珠台


備註 2007年英國電影


配音員 角色名稱 演員

梁志達——豆（Rowan Atkinson飾演）
（男主角，畀人抽中咗獲得法國康城之旅大獎，作為一個非正常外國人嘅佢今次過海又會搞出啲咩大頭佛？）

梁少霞——莎賓（Emma de Caunes飾演）
（女主角，有份參演康城影展參展電影《還我本色》嘅奀星，因為誤會而邂逅阿豆仲好心車埋佢去康城，唔知佢今次有福定有難呢？）

招世亮——紀卡森（Willem Dafoe飾演）
（知名導演，為人自戀兼掗拃，係莎賓嘅米飯班主，憑作品《還我本色》躋身康城影展）

古明華（退行）——達艾禾（Karel Roden飾演）
（康城影展評委之一，因為幫阿豆拍Video搞到唔見咗個仔，仲誤以為阿豆係拐子佬添）

林國雄——牧師（Steve Pemberton飾演）
（片頭主持抽獎活動嘅牧師）



以下為個人感想，僅供參考：

老實講，細個嘅時候都曾經覺得《戇豆先生》系列（電視迷你劇+電影）幾滑稽有趣下。但係唔知係唔係人大咗之後受到生活磨練，幽默感畀凡俗世事吞噬咗一部分。而家再睇翻《戇豆先生》系列，我會覺得有啲離奇：點解哩個傻佬當年可以咁受歡迎？係大家弱智定係我份人無趣？

戇豆一角一直由牛津高材生路雲雅堅遜擔任，令佢本人全球聞名。雖然佢講過好幾次唔想再飾演戇豆，但係始終都有繼續做。可能係出於東西方思維差異，我個人好難想象點解《戇豆先生》會hit咁耐，以至於觀眾一直對相關影視興致不減。不過的確冇辦法唔佩服路雲雅堅遜可以堅持出演戇豆咁多年，作為一個演員佢的確係好敬業。

早年戇豆嘅形象係一個有破壞冇建設嘅戇居佬。但係衍生嘅各種電影上畫之後，雖然睇到銀幕上嘅戇豆依然唔正常，不過某啲場合佢又會顯示出令人眼前一亮嘅急智，例如以上電影裡面利用常見物品同用具“修復”名畫、巧妙確定方向前往目的地，等等。

之前睇明珠台《雷霆喪星》嘅時候，片裡面由潘文柏配音嘅羅拔唐尼講咗一段頗有道理嘅台詞，大致意思係話如果拍嘅電影係講一啲智障或者唔多似常人嘅角色，咁哩個角色一定要係有一定嘅長處而唔係完全智障毫無用處。所以細心諗下，《戇豆先生》系列可能係勝在形成反差先咁多人鍾意。以前《戇豆先生》迷你劇係勝在用傻人形成正常人嘅反差，後來《戇豆先生》相關電影係勝在形成愚中有智嘅反差，畢竟人都會對看似陌生嘅事情好奇嘛，你話係唔係？

snzt

细个睇憨豆先生就系喜剧，大个睇就觉得喜剧背后系悲剧

wulove

話說你發了多少張帖!!

JVT

snzt 发表于 2021-7-4 00:10
细个睇憨豆先生就系喜剧，大个睇就觉得喜剧背后系悲剧

好多喜剧演员都有各种程度嘅精神压抑问题或者悲观情绪，不分中外，中国哩边周星驰同黄子华就够晒明显，外国嗰边例如有自杀身亡嘅罗宾威廉士同哩度讲嘅路云雅坚逊

希索加

黎套都系好旧嘅片

snzt

JVT 发表于 2021-7-4 00:15
好多喜剧演员都有各种程度嘅精神压抑问题或者悲观情绪，不分中外，中国哩边周星驰同黄子华就够晒明显，外 ...

其实我好欣赏憨豆，唔需要语言对白就可以引你笑，就犹如当年的卓别林一样不可多得，周星驰黄子华都未必做得到，不过你话精神有压抑可能真系有，听讲距镜头前镜头后系完全唔同的人

MR.BRYAN

老實說，我已經橫跨不同年份看過《戇豆先生》，迷你劇當然有在aTV播出，97年電影版曾經在aTV播過粵配版及原聲版，當然可惜無人問津，目前97年電影版最熟悉，不用再解釋肯定是大台粵配版。

唯一今次重播有不同的是其中介紹《惠斯勒的母親》衍生商品那幕，以前應該不會剪了，不過這次都自我審查開刀，在“惠斯勒的妹妹”出事了，接著其他都沒什麼改動（不包括接近尾聲在哈利友那幕開始，你明白的）。

始終兒時回憶，有補充，就心安。

JVT

snzt 发表于 2021-7-4 00:54
其实我好欣赏憨豆，唔需要语言对白就可以引你笑，就犹如当年的卓别林一样不可多得，周星驰黄子华都未必做 ...

佢未做戆豆之前就已经红咗，毕竟以前响英国，唔少演员都要有番几年舞台剧功底，甚至成咗名先有机会拍电影
包括到而家，都成日可以见到欧洲演员演技普遍胜过美国演员一筹嘅现象

JVT

MR.BRYAN 发表于 2021-7-4 00:58
老實說，我已經橫跨不同年份看過《戇豆先生》，迷你劇當然有在aTV播出，97年電影版曾經在aTV播過粵配版及原 ...

其实本身97《戇豆先生》剧场版就已经剪走唔少，有人响Youtube摆过部分删减片段，按而家嘅眼光睇其实唔算话有几出位，不过当年有啲观众可能会觉得厌恶或者不安

P.S.：欧洲导演同演员曾经多次抱怨美国电检制度尺度太窄，因为性暗示台词、血腥同性爱裸露镜头响欧洲电影真系唔算得有咩咁出奇

MR.BRYAN

JVT 发表于 2021-7-4 01:07
其实本身97《戇豆先生》剧场版就已经剪走唔少，有人响Youtube摆过部分删减片段，按而家嘅眼光睇其实唔算 ...

文化差異都肯定啦，但現今嘅香港搞咁多所謂國安“捉字虱”……
冇得再唱……