TVB西片《石破天驚》配音表

JVT

影片名稱 石破天驚 The Rock
（美國影帝+英國影帝+民選影帝三強聯手炮製嘅經典動作片，亦係米高·比爾早年票房加口碑最好嘅電影）


首播日期 24/9/2000


重播日期 11/11/2001、10/11/2002、18/9/2005、9/9/2007、28/3/2010、12/1/2014、3/6/2023


播放頻道 明珠台


備註 1996年美國電影


配音員 角色名稱 演員

雷霆（搵雷霆嚟配招sir常配嘅尼古拉斯·基治的確係明智之舉）——葛斯丹（Nicolas Cage飾演）
（計戲份算第一男主角，美國FBI探員及化學武器專家，不過唔多識用槍，憑藉頂尖專業技能而被揀中參加潛入阿卡拉破壞VX毒氣火箭嘅任務）

張炳強（退行，常配，辛·康納利嘅粵配已經同炳強叔把聲畫上等號）——馬約翰（Sean Connery飾演，演員已故）
（計戲份算第二男主角，前英國皇家特種空勤隊上尉，因掌握西方各國高度機密而被囚約30年，作為唯一逃出阿卡拉嘅囚犯因而被選中參加任務）

招世亮（常配，招sir將硬漢將軍哩個角色嘅語氣掌控到得令人有身臨其境嘅感覺）——肯法蘭（Ed Harris飾演）
（第三男主角，美國海軍陸戰隊准將，代號“黑鳥”，多次率偵察部隊執行秘密任務，出於內疚同義憤而利用VX毒氣火箭為殉職部下討回公道）

譚炳文（已故）——胡湛恩（John Spencer飾演，演員已故）
（美國FBI局長，不擇手段諗計阻止第二男主角走甩，最終整親埋隻右手都冇法子阻止對方重獲自由）

陳曙光（退行）——派安力（William Forsythe飾演）
（留二撇雞嘅美國FBI西岸行動組負責人，外表粗獷但實際上挑通眼眉，任務期間畀咗第一男主角非常強大嘅鼓勵同支持）
P.S.：維基百科資料有誤，明顯係曙光叔，唔係毛叔（源家祥）。

林保全（已故）——白湯姆（David Morse飾演）
（台詞讀成“湯”，美國海軍陸戰隊少校，同第三男主角從1968年越戰期間起就係戰友，對哩位老友兼長官至死忠誠不渝）

黎偉明（已故）——安（Michael Biehn飾演）
（美國海軍中校，率領海豹部隊以及第一、第二男主角潛入阿卡拉結果喺浴室中咗埋伏畀人居高臨下射擊，壯烈戰死）

鄭麗麗——葛嘉娜（Vanessa Marcil飾演）
（第一男主角女朋友，信天主教但係未婚先孕，得到未婚夫結婚許諾之後又不顧對方反對嚟三藩市而身陷險境，片尾已同第一男主角成婚）

蘇強文（阿So配哩個角色發癲嗰陣相當到位）——費（Gregory Sporleder飾演）
（大反派，美國海軍陸戰隊上尉，帶自己班友加入第三男主角嘅行動，為咗錢可以完全喪失理智，影片尾段同第一男主角肉搏期間被喂毒致死）
P.S.：台詞讀成中尉，應該係上尉。

梁耀昌（退行）——戴（Tony Todd飾演）
（大反派，美國海軍陸戰隊黑人上尉，帶自己班友加入第三男主角嘅行動，利慾熏心，影片尾段拚埋條命警告大家記住要聽Elton John嘅歌）
P.S.：台詞讀成中尉，應該係上尉。

蘇強文——亨（John C. Mc Ginley飾演）
（美國海軍陸戰隊上尉，從沙漠風暴行動開始追隨第三男主角，喺浴室安裝反震儀令海豹部隊覆滅，影片中後段畀第二男主角防火燒腳落水而死）

張英才（退行）——甘艾爾（Stuart Wilson飾演）
（美國參謀長聯席會議主席，四眼上將，同第三男主角相識多年並非常敬佩對方為人，主持協調各方合力解決VX毒氣火箭被劫危機嘅工作）

黃麗芳——安翠迪（Claire Forlani飾演）
（第二男主角個女，生於1972年之後，喺第二男主角由費蒙特酒店逃走出嚟之前從未見過自己親生老豆，所以對素未謀面嘅爸爸感覺超級唔自在）

黎偉明（已故）——艾馬雲（Todd Louiso飾演）
（美國FBI實習探員，影片開頭同第一男主角檢查喺波斯尼亞難民營搵到嘅包裹嗰陣多手差啲累死街坊，後面幫第一男主角搵到第二男主角個女）

蘇強文——舒（Danny Nucci飾演）
（美國海軍上尉兼海豹部隊隊員，潛入阿卡拉期間監視住第二男主角以防佢著草，影片中段目睹隊友喺浴室被屠殺於是衝動爬上地面駁火被擊斃）
P.S.：台詞讀成中尉，按劇情編排嚟睇，台詞讀錯。

馮錦堂——祈（Bokeem Woodbine飾演）
（美國海軍陸戰隊黑人中士，從沙漠風暴行動開始追隨第三男主角，影片尾段受到黑人大反派威脅拘捕老上司繼而喺混戰中畀第三男主角槍斃）

盧國權——柏（John Laughlin飾演）
（美國空軍上將參謀長，負責將可以消耗VX毒氣嘅鋁熱等離子體交付使用，影片前段喺國防部向大家講解VX毒氣嘅可怕殺傷力）

李錦綸——辛凱頓（David Marshall Grant飾演）
（33歲嘅四眼白宮幕僚長，唔知咁多軍事機密又衰多口導致喺啲軍方大佬面前畀人猛窒）

黎偉明（已故）——Paul（全片冇提過角色名，Anthony Clark飾演）
（口水多多嘅費蒙特酒店髮型師，幫第二男主角剪頭髮嗰陣畀到位佢預備好用嚟吊住FBI局長嘅繩圈並成功甩身，自己就嚇餐死）

林保全（已故）——美國首席大法官（Philip Baker Hall飾演，演員已故）
（影片前段喺國防部眾人面前推薦第二男主角作為潛入阿卡拉任務嘅指路人，仲喺FBI局長面前拍晒心口話第二男主角一定老到走唔甩）

源家祥（已故）——連路易（Howard Platt飾演）
（美國國防部長，影片中前段被告知空軍唔一定可以及時準備好鋁熱等離子體之後立即批准海豹部隊開始潛入阿卡拉嘅任務）

張英才（退行）——美國總統（Stanley Anderson飾演，演員已故）
（對恐怖主義態度強硬，影片後段親自打電話下令批准對阿卡拉嘅空襲行動）

snzt

飞发佬系黎伟明无错啊，何国星同黎伟明吧声都系有好大分别

JVT

snzt 发表于 2023-6-6 04:35
飞发佬系黎伟明无错啊，何国星同黎伟明吧声都系有好大分别

主要系阿星把声少听，我又系睇西片多

asd2008asd

配音表介绍好详细，thanks

神之影

咁多问题

snzt

JVT 发表于 2023-6-6 08:30
主要系阿星把声少听，我又系睇西片多

咁又系，何国星配动画多D

小白菜花

尼部非常怀念呀

JVT

神之影 发表于 2023-6-6 12:25
咁多问题

以前配音工作繁重，出错真系好难避免，而家啲show少好多反而制作方面会更加精良

bayman

配音都死咁多...

JVT

bayman 发表于 2023-6-6 15:30
配音都死咁多...

23年前喔，十年人事都几番新啦