TVB西片《大白鯊》系列前兩部（相對好睇）重配版配音表

JVT

影片名稱 大白鯊 Jaws
（全系列第一部，由史提芬·史匹堡執導，開啟暑假搶錢模式嘅鯊魚驚悚片開山之作，好多影迷認為該片至今仍未被超越）


首播日期 3/8/1986


重播日期 16/8/1987、29/7/1989、20/7/1991、14/6/1992、6/8/1993、8/7/1994、2/8/1995、?/?/199?、2/7/2004、15/7/2006、5/2/2010、9/8/2014、19/6/2016、3/7/2022


播放頻道 明珠台


備註 1975年美國電影


配音員 角色名稱 演員

張炳強（退行，炳強叔演繹得聲情並茂似乎同角色完全融為一體）——布馬丁（Roy Scheider飾演，演員已故）
（第一男主角，帶家人從紐約市搬到阿美提島嘅警長，獵鯊三人組成員，堅信鯊魚襲擊嘅真實性並且專門研究）

林保全（已故，保全叔年齡唔符合角色但係聲演演技令人信服）——胡米特（Richard Dreyfuss飾演）
（第二部台詞讀成“胡麥修”，第二男主角，任職海洋研究所嘅富家子弟，獵鯊三人組成員，對鯊魚極為了解）

陳欣（阿Ken仲好後生不過已經可以食到咁滄桑嘅角色認真犀利）——昆（Robert Shaw飾演，演員已故）
（第三男主角，職業獵鯊人兼“奧加”號船長，獵鯊三人組領隊，性格囂張自負並最終為此付出沉重代價）

林國雄（雄叔將角色貪婪又剛愎自用嘅特點表現得淋漓盡致）——范拉里（Murray Hamilton飾演，演員已故）
（阿美提島市長，成副心思為咗暑假吸引遊客搵錢，所以將第一男主角多次發出嘅鯊魚威脅警告置若罔聞）

蔡惠萍——布艾倫（Lorraine Gary飾演）
（女主角，第一男主角嘅老婆，喺本作當中算係花瓶，因為鯊魚襲人事件頻發而極其擔心老公同啲仔）

沈小蘭——布米高（Chris Rebello飾演，演員已故）
（男女主角嘅大仔，喜好同朋友仔一齊落水玩，聽從爸爸勸告去咗淺水區但仍然親眼目睹大白鯊食人嘅恐怖情形）

鄭麗麗——布肖恩（Jay Mello飾演）
（男女主角嘅細仔，鍾意模仿老豆啲動靜，成日想跟住大佬去玩不過大佬一有人陪就撇甩佢）

區瑞華（退行）——祈（Lee Fierro飾演，演員已故）
（第二個受害者嘅媽媽，個仔死後傷心欲絕，將阿美提島海域存在殺人鯊魚嘅事四圍宣揚）

蘇強文——韓德（Jeffrey C. Kramer飾演）
（台詞有一句讀成“亨特”，第一男主角下屬警察，幫第一男主角到處處理各種奇怪雜事）

林丹鳳——寶莉（Peggy Scott飾演，演員已故）
（第一男主角下屬秘書，一個好長氣嘅白髮阿嬸）

盧國權——查理（Robert Chambers飾演，演員已故）
（夜晚想靠嚿燒牛肉捉鯊魚嘅傻佬，結果畀大白鯊拖咗落海差啲命仔凍過水）

黃子敬——丹德（Edward Chalmers Jr.飾演，演員已故）
（台詞讀成“阿狄”，另一個夜晚想靠燒牛肉捉鯊魚嘅傻佬，因為企得離岸比較近而冇畀大白鯊拖落水）

黎偉明（已故）——Cassidy（全片冇提過角色名，Jonathan Filley飾演）
（一開頭打算同第一個受害者鴛鴦戲水嘅後生仔，好彩因為飲得太醉除唔到啲衫褲而冇游到）
P.S.：雖然唔係絕對確定（準繩度75%）本角色由黎偉明聲演，不過哥頓聲庫館寫鄧sir（鄧榮銾）絕對有誤。

林元春——屈姬絲（Susan Backlinie飾演）
（第一個受害者，夜間剝晒衫跳落海游水，結果畀大白鯊咬到支離破碎）

林丹鳳——祈亞歷（Jeffrey Voorhees飾演）
（第二個受害者，攞浮床落水玩緊嗰陣畀大白鯊當眾咬死，令阿美提島有食人鯊一事公諸於世）




影片名稱 大白鯊續集 Jaws 2
（全系列第二部亦係續集當中最好睇嘅一部，有部分人認為哩部係狗尾續貂，不過個人認為只不過係大家比較by史提芬·史匹堡）


首播日期 21/6/1985（第二部居然比第一部更早喺TVB首播，都算比較罕見同離奇）


重播日期 23/8/1987、30/7/1989、21/7/1991、9/7/1992、13/8/1993、15/7/1994、9/8/1995、?/?/199?、13/8/2004、22/7/2006、16/8/2014、26/6/2016、10/7/2022


播放頻道 明珠台


備註 1978年美國電影


配音員 角色名稱 演員

張炳強（退行，炳強叔一如前作穩定輸出）——布馬丁（Roy Scheider飾演，演員已故）
（男主角，阿美提島警長，本作由於再次懷疑近期各種離奇事件係鯊魚所為而得罪市政府同投資方，慘被炒魷）

蔡惠萍（Judy第二部有發揮而且配到作為媽媽嗰種外柔內剛嘅feel）——布艾倫（Lorraine Gary飾演）
（女主角，男主角老婆，為阿美提海岸公寓大廈建築商打工，無論點都全力支持老公而且好緊張兩個仔）

馮錦堂（當時堂哥成日配啲熱血青年已經駕輕就熟）——布米高（Mark Gruner飾演）
（男女主角17歲嘅大仔，一日到黑掛住同啲朋友出海玩，畀老豆以安全為由捉去打暑期工，後面同大家偷偷出海結果出事）

鄭麗麗（麗麗真係配得個角色好百厭）——布肖恩（Marc Gilpin飾演）
（男女主角嘅細仔，同以前一樣吊靴鬼咁吊住個大佬，但係經常性被嫌棄）

鄧榮銾（退行）——庇連（Joseph Mascolo飾演，演員已故）
（阿美提海岸公寓大廈建築商，女主角上司，因為男主角成日話有鯊魚對自己嘅商業計劃造成威脅而針對佢）

林國雄（雄叔都一樣保持前作應有嘅水準）——范拉里（Murray Hamilton飾演，演員已故）
（阿美提島市長，又一次因為男主角聲稱阿美提島海域有鯊魚而感到極其頭痕）

蘇強文——韓德（Jeffrey Kramer飾演）
（阿美提島副警長，本作據男主角所講迷戀警艇，對男主角非常尊敬，電影後段更陪男女主角開船出海救人）

梁少霞——積琪（Donna Wilkes飾演）
（疑似女主角上司千金嘅表姊，17歲，男女主角大仔嘅暗戀對象，電影後段遭遇大白鯊襲擊之後嚇到幾乎黐線一味高聲尖叫）

蘇強文——安迪（Gary Springer飾演）
（又叫“尼克”，男女主角大仔嘅死黨，平時有上潛水課，表面同老死一樣嫌棄但係實際上好錫老死個細佬）

李秀儀（退行）——庇寶姬（Gigi Vorgan飾演）
（疑似係女主角上司嘅千金，內向四眼仔嘅暗戀對象，一心想介紹表姊畀男女主角嘅大仔識）
P.S.：據《美少女戰士S》前13集嘅木野真琴推測，準繩度80%。

張錦江——小范拉里（David Elliott飾演）
（市長個仔，同老豆同名，性格比較老串，電影後段經歷大白鯊襲擊之後變得異常暴躁）

林元春——韋婷娜（Ann Dusenberry飾演）
（阿美提小姐，同條仔習慣性放閃，先後目睹快艇爆炸同殺人鯨屍體，影片中後段條仔畀大白鯊食咗之後嚇到癡癡呆呆）

陳永信——愛德（Gary Dubin飾演，演員已故）
（台詞有時讀成“艾迪”，阿美提小姐條仔，先後目睹快艇爆炸同殺人鯨屍體，影片中後段跌落水之後由於游得唔夠快而命喪鯊口）

陳維舜（退行）——道格（Keith Gordon飾演）
（性格外向嘅四眼仔，同內向四眼仔比較熟，係第一個艘風帆畀大白鯊撞到反轉嘅出海少年）
P.S.：據《蝙蝠俠再戰風雲》嘅石子平推測，準繩度70%。

梁耀昌（退行）——添（G. Thomas Dunlop飾演）
（台詞有時讀成“添美”，性格內向嘅四眼仔，同外向四眼仔比較熟，暗戀庇寶姬，男女主角嘅大仔撞親頭之後負責送佢去醫院）

黎偉明（已故）——卜（Billy Van Zandt飾演）
（台詞讀成“波比”，市長個仔嘅死黨，兩條友坐埋同一艘風帆）
P.S.：純粹係感覺啲聲談好似，準繩度75%。

雷碧娜——露絲（Cynthia Grover飾演）
（柏崔條女，遭遇大白鯊襲擊之後向上帝祈禱，影片末段跳落水之後畀大白鯊魚鱗刮走肚上面成層皮流晒血）

林國雄——柏崔（Ben Marley飾演）
（又叫“奇雲”，露絲條仔，男女主角嘅細仔唔敢接繩嘅時候有幫口勸，條女畀大白鯊刮損之後又奮不顧身游埋去拖佢上岸）
P.S.：純粹係感覺佢拋繩畀男女主角嘅細仔嗰陣啲聲談好似，而且懷疑後面佢救條女嗰陣有一兩句係其他人配嘅，準繩度85%。

談佩珊（退行）——瑪芝（Martha Swatek飾演）
（台詞有時讀成“瑪殊”，同男女主角嘅細仔坐同一艘風帆，並為咗救跌落水嘅佢而慘變唯一畀大白鯊吞噬嘅出海少年）
P.S.：純粹係感覺佢同前面配艾博士嘅聲談好似，準繩度50%。

鄧榮銾（退行）——Polo（全片冇提過角色名，John Dukakis飾演）
（喺酒吧建議大家一齊出海去燈塔玩，間接導致出海少年畀大白鯊襲擊，男女主角嘅大仔撞親頭之後負責送佢去醫院）

談佩珊（退行）——艾（Collin Wilcox飾演，演員已故）
（台詞讀成“艾基斯”，幫殺人鯨驗屍嘅博士，否定男主角認為大白鯊可能係嚟報仇嘅猜想）
P.S.：據《小熊維尼歷險記》嘅袋鼠媽媽推測，準繩度95%。

李智良（退行）——湯（Barry Coe飾演，演員已故）
（潛水教練，喺水底捉龍蝦撞到大白鯊嚇到急速游上海面引發栓塞，接佢嘅救護車吸引男女主角前往碼頭並隨即發現個仔出咗海）
P.S.：據《叮噹》嘅技安同《幽游白書》嘅桑原和真推測，準繩度60%。

黃子敬——霍菲爾（Herb Muller飾演，演員已故）
（台詞讀佢嘅姓氏讀成“霍加迪”，影相舖老闆，幫男主角曬遇害潛水員喺水底拍攝到嘅大白鯊相出嚟）



以下為個人感想，僅供參考：

1975年，《大白鯊》嘅橫空出世令電影界從此出現一種新嘅類型影片——popcorn movie（爆米花影片）。

以現代人嘅眼光嚟睇，《大白鯊》嘅場景同道具可謂相當簡單甚至簡陋，尤其是條機械大白鯊Bruce更加係假到不得了，但係導演對劇情嘅編排同把握以及對氛圍嘅營造至今依然唔算過時。當年拍攝前兩部嘅時候幕後主創團隊揚長避短，明知機械鯊魚睇起身太假所以盡量減少拍攝水下大白鯊嘅鏡頭，甚至連大白鯊浮出水面嘅鏡頭都比較慎用，而且仲將真假鯊魚鏡頭混合使用，因此前兩部嘅拍攝效果相當唔錯（後兩部咁差嘅其中一個重要原因正係哩方面唔掂）。

而影片立意方面，《大白鯊》前兩部拍攝嘅時候西方社會正或多或少受到社會主義運動餘波嘅衝擊，因此劇本亦都好注重表現資本家嘅貪慾同上下階層嘅觀念衝突，立意可謂相當貼地。而《大白鯊》前兩部亦保有舊時電影特意表現嘅銀幕英雄形象，哩個英雄正正就係男主角——警長布馬丁。雖然男演員喺第二部拍攝期間認為觀眾只會想睇大白鯊而唔係睇佢，並多次同幕後團隊起衝突，但係前兩部嘅成功無疑同對片中人物形象嘅精心塑造頗有關聯。而哩一點，喺後兩部我基本上見唔到。

fans

老实说我比较喜欢2000年系列的

JVT

fans 发表于 2022-8-6 18:58
老实说我比较喜欢2000年系列的

2000年系列？《大白鲨》有咁后期嘅正统续作咩？未听过

生化之父

前2部最成功，而后期制作的那2部有点失色？

JVT

生化之父 发表于 2022-8-6 19:09
前2部最成功，而后期制作的那2部有点失色？

直头唔系一个等级，第三部依赖当时仲未算成熟嘅电脑技术整鲨鱼图像假到出汁，第四部用翻机械鲨鱼但系成日影水下镜头搞到假到无伦，剧本又单薄，非常唔掂

JVT

好心情 发表于 2022-8-6 19:40
大白鲨有资源吗？

又系哩种问题咖，论坛“粤梦高清园”版块有出售资源

ack9517

大白鲨前2部最成功的

kjtifl

非常血腥阿，睇到我都惊鲨鱼

snzt

谈佩珊系边位？第一次听呢个名