TVB版西片《黑雨》舊配音表

JVT

影片名稱 黑雨 Black Rain
（20世紀80年代美日經濟爭霸時期由列尼·史葛執導嘅黑色動作劇情片，喺本人眼中係一部比較中肯咁展示西方同日本衝突嘅電影）


類別 電影


首播日期 5/1993（具體日期不明）


重播日期 17/5/2001、1/3/2002、12/5/2021、16/11/2021


播放頻道 明珠台


備註 1989年美國電影


配音員 角色名稱 演員

招世亮（常配，招sir把聲冇原聲低沉不過演技超正）——鄺歷克（Michael Douglas飾演）
（美國男主角，一個功勛卓著但係有收黑錢嫌疑嘅離婚紐約警探，性格叛逆，因為同拍檔多管閒事而被派押送犯人去日本）

張炳強（退行，炳強叔完美咁展現角色嘅掙扎同矛盾）——松本正廣（高倉 健飾演，演員已故）
（台詞讀成“吾妻正廣”，日本男主角，大阪府警局刑事課助理督察，老派日本打工仔性格，識英文並負責監視兩個紐約警察）

黃健強（退行，飛哥把聲比原聲老咗少少但係好食性格）——溫查理（Andy Garcia飾演）
（同男主角肝膽相照嘅拍檔，28歲，好叻social，鍾意用西裝褸同摩托車手玩鬥牛，事實證明哩樣係非常唔好嘅習慣）

翟耀輝（聲演演繹完全跟隨角色情緒）——佐藤浩史（松田 優作飾演，演員已故）
（台詞讀成“佐藤浩次”，大反派，日本黑幫小頭目，喺紐約食組長夾棍劫奪偽鈔電版嗰陣畀男主角同拍檔捉住，但事情冇咁簡單……）

盧素娟（已故）——祖茜（Kate Capshaw飾演）
（大阪宮古夜總會舞女，來自美國芝加哥，同男主角保持住若即若離嘅公私關係）

源家祥（已故）——西水一雄（若山 富三郎飾演，演員已故）
（年近花甲嘅日本黑幫組長兼宮古夜總會股東，性格守舊，同大反派之間嘅火拼導致成個大阪氣氛緊張）

林國雄——小橋（神山 繁飾演，演員已故）
（台詞讀成“松田”，日本大阪府警局刑事課警司，命令松本正廣監視兩個美國警察以阻止佢哋干涉案件）

林國雄——亞利（John Spencer飾演，演員已故）
（美國紐約警局隊長，男主角上司，相信男主角冇收黑錢）

源家祥（已故）——尤巴利（Bruce Katzman飾演）
（男主角嘅律師，喺男主角畀內事部人員質詢嘅時候負責協助佢）

P.S.：TVB貌似已經將早年唔少配咗音嘅電影重配，搞到我開頭一度聽錯以為係鄧榮銾鄧sir配安迪·加西亞（本人好少睇動畫而且飛哥以前配男主角嘅好多電影已經重配）。而且本片出現兩個配音員配同一個角色嘅情況，因此另外列喺下面而唔放入正式配音表。

梁耀昌（退行）+馮錦堂——梨田（內田 裕也飾演，演員已故）
（大反派嘅馬仔，喺大阪機場扮警察用日文保險單呃咗男主角，又喺鋼鐵廠同男主角駁火）



以下為個人感想，僅供參考：

上世紀七八十年代，日本經濟長期高速發展，令資本主義世界老大美國頗感威脅。雖然通過“廣場協議”有效限制日本對美國市場嘅衝擊，但係日本再度崛起嘅事實仲係令美國人非常好奇。於是，荷里活於八九十年代拍咗一大堆試圖剖析日本人性格嘅電影，例如《太陽帝國》（Empire of the Sun）、《特警威龍》（The Punisher）、《旭日追兇》（Rising Sun）等等，其中我覺得拍得最出色嘅就係由列尼·史葛執導嘅本片——《黑雨》。

第一次睇《黑雨》我仲讀緊小學，哩部美日合拍嘅電影係我睇咁多明珠台粵配電影裡面最深刻嘅一部，所以就算而家明珠台高清重播冇配粵語音軌我都照用DIY合成版睇多次，並且寫低個人感受。陣容可以講得上係星光熠熠，無論係導演列尼·史葛，定係參演嘅米高·德格拉斯、高倉健、安迪·加西亞同松田優作，都為本片嘅拍攝作出精彩嘅努力。

《黑雨》以一種算係比較中肯嘅眼光看待日本人同日本文化，而且比較少有嘅係，選擇以大阪哩座對美國人相對陌生嘅城市作為舞台，而唔係更為人熟知嘅東京。從本片嘅敘述當中，內容核心突出嘅係美國個人主義同日本集體主義嘅衝突同互相適應。美國男主角鄺歷克係一個叛逆暴躁而又能幹嘅辣手神探，日本男主角松本正廣則係一個正直但對集體同上司唯唯諾諾嘅中年警察，兩個人行事處世南轅北轍，全靠中間人溫查理從中調和。查理殉職之後，歷克同正廣先有機會深入了解同理解對方嘅原則，並聯手打敗佐藤浩史。

本片對日本人性格嘅表現係本人覺得最出彩嘅部分，片中三個日本人西水一雄、松本正廣同佐藤浩史實際上係當時日本社會老、中、青三代人嘅性格寫照。下面本人從影片情節出發，結合自己對日本歷史嘅理解，分析哩三種人同埋三種性格係點樣折射出日本人心態嘅。

西水一雄出生於日本軍國主義年代，幼年經歷美軍對日本本土嘅大空襲，對空襲過後嘅“黑雨”印象刻骨銘心。面對日本社會快節奏嘅劇變而維持保守嘅作風，既鄙視佐藤浩史哩種事事以利益為先嘅新一代日本人，內心又仇視控制同改造日本嘅美國人。

松本正廣如果唔係遇上鄺歷克，作為一個普通嘅日本中年男人，可能就會喺集體制度之下營營役役咁做到退休，絕對唔敢打破常規。作為喺戰後美軍駐日時代長大嘅佢，曾經佩服美國人嘅聰明同強大，而面對日本當下迅速追趕美國嘅勢頭又暗自竊喜同期待，屬於典型自己過得唔算特別好但係卻會為國家嘅強大而歡欣鼓舞嘅平凡人（同目前好多中國普通老百姓嘅心理極其相似）。

佐藤浩史被認為係已經忘記信義為何物兼且認錢唔認人嘅“新日本人”，從西水一雄哩種老頑固嘅立場睇嚟，佢甚至唔算得上係日本人而應該係美國人。因為佢以下犯上挑戰幫會嘅權力架構仲夠膽食大佬夾棍，行事為所欲為，更加似信奉個人主義嘅美國人。但係其實佐藤浩史只不過係日本歷史上“下剋上”傳統喺新世代嘅另一種代表，而且佢講過自己極受手下嘅尊重，可見佢並非想破壞日本固有嘅傳統，而係想自己利用日本文化中嘅潛規則嚟摧毀既得利益者現行嘅明規則，本質上依然係一個如假包換嘅日本人。

綜上所述，日本係一個又排外又難以改變嘅國家，日本人同世界列國芸芸眾生一樣，以追求利益為根本目標，只係手段比較特殊。有人曾經解讀過話日本係一個崇尚“恥”文化嘅國家，哩個只不過係表象。正如亞視劇《國際刑警1997》第一單元《傘之輓歌》裡面陳惠敏飾演嘅日本警察所講，佢哋鞠躬係想人哋原諒同唔好怪責自己。所以，日本人崇尚“禮”，本質上不過是為咗推卸責任同避免做箭靶，並非真係有咁高嘅道德水平。就好似本片劇情最後咁，當鄺歷克同松本正廣違反紀律私自成功逮捕佐藤浩史歸案，小橋警司只會表揚而唔會追究其中嘅不合規矩之處。話到尾，喺根本利益面前，所有規矩同準則，都會變得冇咁重要。

kjtifl

Kate Capshaw果阵都算系尤物

46476639

我记得以前看康熙微服私访记的时候，就知道招世亮。以前傻傻的以为同村人。

JVT

46476639 发表于 2022-5-14 14:49
我记得以前看康熙微服私访记的时候，就知道招世亮。以前傻傻的以为同村人。

同村人？何解？

snzt

难得，我好少听到黄健强系西片出声

JVT

snzt 发表于 2022-5-14 18:33
难得，我好少听到黄健强系西片出声

以前好多，后期唔知点解飞哥做主角啲片好多重配晒，例如《风月俏佳人》

46476639

JVT 发表于 2022-5-14 16:35
同村人？何解？

同姓你懂了吧？？村里。小的时候没想那么多。

jy0555

你真系发左呢篇野啊，你都知我边个噶啦

zqyang

有几个配音员已故

JVT

zqyang 发表于 2022-5-16 21:25
有几个配音员已故

93年配，毕竟29年前