(轉載生果報)聲演Elsa 港產聲優走到幕前

ddarcy · 发表于 2018-4-15 16:44:57

本帖最后由 ddarcy 于 2018-4-15 16:46 编辑

【本報訊】網上有資深配音員近日發起「一日一分享」，鼓勵業內人士分享行業辛酸。外判、走數，賤價頂爛市……雖說是夕陽行業，但在迪士尼動畫《魔雪奇緣》聲演愛莎（Elsa）的黃紫嫻卻是個例外，小時候是《美少女戰士》鐵粉，夢想做配音員，中學甫畢業即入行夢想成真，這個擅聲演公主和美女的80後配音女王，新近更走到幕前，在唱片市道同樣疲弱下，拉闊戰線出實體Hi Fi碟，創出新天。
開fb專頁　分享行業心得
一把靚聲有幾重要？在開放免費電視頻道大購外劇，甚至透過QR code收聽報紙、行博物館下載導賞App的新時代，它再次受到重視。但同一時間，廣播劇式微、小孩不再追看電視卡通片，擁有一把好聲音的配音工作，卻也走向黃昏，「𠵱家啲小朋友好多娛樂，（配音員）好難再配到好似叮噹、小丸子同花師奶咁家喻戶曉嘅角色」。2003年入行，早過了行業的黃金時代，入過大台配音組，又試過過檔香港電視，為一代人共同編織電視夢，現時自由身的黃紫嫻，比很多人都清醒。
黃紫嫻除了為卡通、日劇韓劇配音，還有太空館節目介紹、玩具店開心廣播，甚至為歌星唱Demo和出Hi Fi碟，「呢個行業唔會搵到大錢，但就畀到好多嘢我」。她口中的「好多嘢」，可以是滿足感、也可以是影響力，黃紫嫻是少數設facebook專頁的配音人，分享行業心得，早前大台財經資訊節目指業內配30分鐘劇集，最高只有120元的待遇，她肉緊出聲明澄清，引爆茶杯裏的風波，成為網民熱話；新近又上載與曾俊華的合照，分享導配電影點滴。
「𠵱家資訊發達，以前想入行都冇門路」，沒機會就創造機會把握機會，三歲定八十，中六暑假，機會來了，演藝學院開辦只有6堂的暑期配音班，讓她遇上伯樂，「我係好好彩，係師父謝月美帶我入行，佢嘅配音公司專接迪士尼動畫，好多機會」。首次走進錄音室，猶如置身大觀園，人人一埋位就變聲，為熟悉的卡通人物貫注生命，她這個新丁，乾等半天只等扮路人甲、扮BB大嗌糖糖，已樂在其中，「初入行最想配卡通，一來自己鍾意，二來聲線啱，最得心應手」。
配音易學難精，聲線甜到漏，擅演公主與美少女，角色都是萬人迷，她直言配卡通勝在自由度大：「可以有多啲空間創造角色性格，如果配劇集，無論口形配對定係情感掌握，都要求比較準確。如果演員本身好好戲，你就會好慘，差少少已經好核突；相反演技好差又係死，演員喊得好假，你配音喊得傷心過佢，效果又會食唔到公仔畫面」。韓劇情感強烈，難或易，她笑言看性格，難一概而論。
「配音好似演員，演員要試鏡，配音都要試音，我把聲開心揚聲嗰種，做食住煙嘅飛女角色會好怪；做古裝片亦好難，前輩話後生呢輩配古裝唔好，冇古裝味，簡單如叫一句公子，感覺已經唔同」。時代轉變，配音員的經驗和文學修養，加上成長之中的古裝片，質素也已不同：「睇呢啲長大，自然就有呢種文化。」夾在前輩與習慣即食的新世代之間，入行15年的黃紫嫻，直言早兩、三年，無論行業或自己，都遇上樽頸。
出Hi Fi碟　轉型走出黃昏
「20歲嘅角色可能係我配得最好，但有年輕人入行，就要畀機會佢哋去試，佢哋做20歲，我把聲音又未配到阿媽角色」。走進事業上的樽頸，卻遇上配音生涯的代表作，讓她有機會聲演《魔雪奇緣》內愛莎的角色，大受歡迎，在再沒明星級配音員的年代，異軍突起，成為小朋友的偶像，「我係好幸運遇到呢個角色，就算冇睇粵語版配音，冇聽過我把聲，呢個角色，一講你都一定會知」。名氣帶動機遇，網絡平台，讓每個人成為自己的主角。
設專頁變成行業KOL，就如日本受歡迎的聲優，黃紫嫻甚至首次以配音人身份，由幕後走進幕前，在唱片市道同樣疲弱下，拉闊戰線出實體Hi Fi碟，正式跳出幕前做歌手，「唔係想做靚聲王，如有一把靚聲但冇情感，啲嘢係唔會入到心。配音好、唱歌好，都係一樣」。配音員工作在外判及頂爛市下淪為夕陽行業，如何藉轉型走出黃昏？故事未完，但作為港產聲優的黃紫嫻，也許是個小小的啟示。
■記者呂麗嬋