广州旅游 之 南沙游艇会

进击的鹏飞

   

       广州好玩好食嘅地方数之不尽，咩白云山啊、广州塔啊、江南西啊，相信好多广州人都了如指掌，而今日我地带大家去嘅地方呢，就真系非常犀利啦，喺果度你可以置身于英式建筑嘅浪漫氛围之中，亦可以吹住阵阵海风，欣赏游艇拍岸，有如置身欧洲一样，仲可以疯狂打卡，做个 IG 红人，咁样嘅地方，你又知唔知喺边度呢？

        都系等我地嘅广州旅游指南针——杰克 帮我地开估啦，有请杰克出场~！（\^o^/）

         没错！今日我地去嘅就系~南沙游艇会！！

        

       查实南沙游艇会位于广州市南沙湾虎门大桥嘅下游、南沙客运港上游大约200至800米嘅地方，而且系广州南沙区政府同霍英东集团携手开发嘅高端游艇会项目，系中国内地第一家获英国游艇码头协会颁发“五金锚奖”嘅游艇会，亦都喺2018年正式通过 MIA 嘅白金五金锚评定，成为“白金五金锚”嘅游艇会，总之一句话讲晒，就系劲到核爆啊~！

        而且为咗推介俾大家放假嚟玩，杰克系放假前就专门抽时间出嚟同你去踩踩点，通过杰克拍翻嚟嘅视频，我地见到平日嘅南沙游艇会，游客唔算多嘅情况下，一眼望去，呢条可以睇到咁多英式建筑，又可以吹到海风嘅大街，直头就系好似俾你自己一个包晒场咁，畅行无阻啊~！

        你睇你睇，最犀利就系呢个位置啦——传说中嘅游艇会中心！成个南沙游艇会嘅精华之所在，但系睇落去之前要做好心理准备喔！因为老细话，你要手持一张六十八万嘅 VIP 会员卡先可以入得去，嗯，等我睇下有冇打错字先，六十八万，冇错，系六十八万啊！

        其实呢度，系船东停船嘅地方嚟嘅，亦即系话，里面嘅人最起码都系开住一艘游艇啦，仲有啲准船员系度考游艇资格证添，教练，我都想学游艇啊，我可唔可以报名啊？

        虽然我地冇游艇，但系有幸受到老细嘅特别优待，可以入去参观一下，咁大家仲等咩啊，睇住我地嘅视频，一齐嚟游览呢个地方啦！

        嚟！去片~！

        https://www.bilibili.com/video/av84336629/

        如果你都想知我地下次会去边度玩，欢迎扫描下面嘅 QR Code ，关注我嘅 WeChat 订阅号：乜都讲餐饱

                                                                     

        

氷華鏡

有机会去行下。

UZIXA

多謝分享你系廣州的旅程

R136A1

可惜唔搞艇仔粥卖！

win

我都幾中意D歐陸風情建築同街道, 多謝樓主分享廣州靚景

勇者罗兰

68万。。。所以我未去过

moschino

个会员卡要唔要每年又交几多万续费·······

randalW

适合lolita影相！

yingjie

无咁多钱啊…

进击的鹏飞

moschino 发表于 2020-1-21 20:24
个会员卡要唔要每年又交几多万续费·······

我地都冇游艇，所以唔知道啊，应该要挂，好似D停车位咁，都要每年交钱啦~