TVB動畫配音正在衰落

fokdaniel

黃金時期唔夠黃金，唔代表唔譴責黑暗



我好少講到配音背後嘅安排同制度，因爲呢D資料唔容易觀察，喺節目到只可以睇到佢影響出嚟嘅結果，冇得直接睇到佢乜事。要知佢乜事，要靠傳媒報道、網媒消息、同好消息，但三者都有準確度求證困難的問題。講違反事實嘅嘢，呢度係禁止嘅，我亦過唔到自己嗰關。

不過，有D事經過唔同求證功夫，証明咗的確係，而且有重大影響，甚至有人唔肯承認或正視，咁我覺得真係唔可以唔講個真相。

我想講嘅係，大台喺人事上嘅無理調動，對動畫嘅負面影響，唔係大家可以用鴕鳥政策解決嘅問題。

要講全貌，要由好多年前講起，差唔多有十幾二十年。大台其實從來冇一隊full team嘅導配人手，可以完全做好動畫嘅翻譯配音後製質素。不過，當時嘅節目部舵手何冠中先生在陳志雲先生的支持下，仍銳意開拓非兒童向的晚間深度動畫時段，配音組主管也因應作品所需，給予勝任的導配，包括有些是新晉的。這令到有若干套晚間深度動畫的翻譯和配音，比其他時段的動畫做得好，在當時獲得口碑。（當中最出名嘅係《死亡筆記》，其他嘅仲有《魔剎》、《甲賀忍法帖》等）

後嚟何先生更開闢J2，定位做年輕人台，動畫是佔很重比例的主打，增加大量非兒童向動畫。無可否認，配音組人手是不足的。雖然當時配音組再增加人手，但係初期亦有好多大熱作品嘅翻譯強差人意。後嚟先再透過增加熟悉動畫導配去改善。喺背水戰期間，何先生開展咗動畫管問制度，由香港開山級宅人簡艦長領軍。甚至在cut片問題，時段問題等，也曾有過改善。

可惜嘅係，配音組嘅人手始終有限，同時配音組始終要負責一大堆非動畫嘅配音，唔可以要個個導配都熟悉動畫，一樣需要一些唔熟動畫但熟悉各種劇集嘅專才。在人手分配上，雖然當時的配音組主管、副主管也盡量把熱門動畫給予熟悉的人處理，但同一時間太多，總會有些動畫要分給不熟悉的人去做。其中定位做兒童向嘅，例如Beter兄長期最緊張投訴嘅《寶石寵物》、《花樣精靈》、《星夢學園》嗰D，喺難度上嘅取捨下，都係未必會比到最熟悉動畫嘅人做。或者做嘅人係有心，但係同時間太chur，例如要兼顧劇集或者要趕寫稿等，都會導致容易多咗錯漏。

針對呢個問題，係有構思過改善方法嘅，其中最徹底嘅係考慮成立動畫組，唔單止可以最大程度保證在位嘅人對動畫有heart，唔需要兼顧劇集，仲可以唔只處理譯稿同配音，包括字幕、歌詞翻譯、剪接問題等都有say。當然好遺憾，結果呢個咁鑽石嘅理想從來冇實現過。

仲有唔少其他方案，當中一定唔少得嘅係薪酬待遇方面。只不過又係一直實行唔到。

但縱使冇鑽石，我哋唔可以否認J2嘅開台，同埋佢對動畫處理嘅制度同人事安排，令到動畫粵配有過黃金期，令到唔少非兒童向嘅作品質素提升過。佢嘅提升結果唔係完美，但唔等於佢唔成立。

咁制度幾時被摧毀呢？其實有參與過智囊團工作嘅朋友都已經早知。不過當中涉及唔少人名，我已經將呢段準備發表嘅內容，同埋背後唔會發表嘅証據，全部向本會嘅最大版主呈請咗，等佢批准我先至貼出。

經過相關人士的一連串大型變動後，上方講過種種令粵配動畫好嘅方案，實行唔到嘅當然永遠實行唔到，本來已經實行咗嘅亦被強行打回原形，當中有D參與者、出力者同執行者甚至慘被孭黑鑊。

到而家，壞影響更變本加厲，在上嘅人可以直接現兜兜炒配音員，拍枱大罵，講明就係睇唔起動畫，肆意侮辱前線專業。有人頂唔順個環境自己走，有人肯吃苦頭就被炒，仲喺度而又有heart做動畫嘅人都仲有，不過可能經驗唔夠前人多，同埋喺咁嘅環境下都唔會有氣氛做嘢，會覺得好辛苦好絕望。

所以，雖然黃金時期都仲係未夠黃金，仲係會被Beter兄看不過眼，但不要否定黃金時期，不要把眼前確確實實嘅黑暗期掩飾咗佢，不要不譴責黑暗、縱容黑暗嘅擴大。

超人铁兵

行紧以前ATV的旧路，慢慢将配音放在冷宫，迟早出事

hzhhzh

我觉得粤语配音绝对系TVB唯一嘅优势，高层实在蠢得交关。

Pasu

粤语越嚟越不受重视

qasdy7

现在少人看电视没办法

hzshuma

粤语动画买少见少了

karenlau

「魔殺」浦澤直樹大神的著作了，因為情商超前係當年很少人知道佢。我都很意外大台會買來配音，呢套動畫陣容已經成為神級配音了，求取一個路人都係盧素娟，程文意佢地

allpoogi

無線配音比其他公司好，不過配音非無線主力製作。

fasn

留名
雖然內情我唔知道, 但非常睇唔過眼一班冇心搞電視, 不知世情既高層