日志
彩雲國物語 OP廣東話版 日本人大讚美聲
記得細個一放學就會開電視睇動畫，日日聽嘅廣東話版主題曲自然朗朗上口。每年暑期播嘅兒歌金曲頒獎典禮更加係一定會睇！不過依加廣東話動畫主題歌已經係時代嘅產物。
之前hoki同大家介紹咗21世紀嘅日文歌改編廣東話詞，然後有網民提供資訊話以前鍾嘉欣唱嘅彩雲國物語都好受日本人歡迎。
彩雲國物語@日本
充滿中國風嘅故事彩雲國物語由2006年4月開始喺NHK播放，Opening「はじまりの風」（起始之風）由以柔美歌聲獲得高人氣嘅平原綾香演唱.
平原綾香官方網頁：http://www.camp-a-ya.com/
彩雲國物語@香港
香港方面，繼07年Animax播放之後，TVB亦都係08年開始播彩雲國物語。Opening《起始之風》就由鍾嘉欣演唱。
根據網友提供嘅資訊去日本niconico一搵，就搵到鍾嘉欣唱嘅廣東話版《起始之風》。
日本網民反應
網民大讚嘉欣靚聲，而因為故事充滿中國色彩，有日本網民甚至話呢個更加似原版。
（片頭畫面照出日本staff）「香港有種忠於日本原著嘅感覺」
「睇香港電影就愛上咗廣東話」「覺得廣東話有種粗魯嘅感覺但係呢首歌好動聽呀」
（仲有綠色字幕君好有心咁譯返廣東話歌詞做日文）
填詞人
「乘着風傾聽誰故事 傳遞中可有誰會意」為《起始之風》加上中文歌詞，將日文歌翻譯得更傳神嘅填詞人鄭櫻綸原來仲有其他動漫兒歌填詞。
同樣由鍾嘉欣唱嘅《動物橫町》亦係由鄭櫻綸填詞。
佘詩曼唱嘅《星星的加冕》都係出自佢手。「嗚啦啦 嗚啦啦呢〜」好想瘋狂聽兒歌懷愐下呀。
