TVB西片《大白鯊》系列後兩部重配版（第三部）及三配版（第四部）配音表

JVT

影片名稱 大白鯊三集 Jaws III
（全系列第三部，由本作開始該系列畀一大班觀眾認為質量直線下降，以電腦技術3D建模嘅大白鯊亦都冇取得預期效果）


首播日期 30/8/1987


重播日期 31/7/1989、6/7/1990、21/7/1991、20/8/1993、22/7/1994、16/8/1995、20/8/1996、?/?/199?/、29/7/2006、11/4/2009、5/2/2010、24/8/2014、9/7/2016、17/7/2022


播放頻道 明珠台


備註 1983年美國電影


配音員 角色名稱 演員

馮錦堂（同前作一脈相承繼續配哩個角色）——布米高（Dennis Quaid飾演）
（男主角，女主角條仔，任職於海洋世界嘅工程師，準備跳槽去委內瑞拉做嘢，影片尾段冒險修補畀大白鯊母鯊撞到入水嘅海底隧道）

鄭麗麗（麗麗後生嘅時候把聲真係甜到漏）——莫嘉芙（Bess Armstrong飾演）
（女主角，男主角條女，喺海洋世界負責訓練海豚同殺人鯨嘅博士，猶豫緊跟唔跟男主角去委內瑞拉）

鄧榮銾（退行）——費菲烈（Simon MacCorkindale飾演，演員已故）
（人稱“菲烈大帝”，英國第16代哈頓菲伯爵兼著名攝影師，專門嚟拍攝海洋世界開幕嘅盛況，對以任何方式博取關注都非常感興趣）

陳欣（今次輪到後生遙遙嘅阿Ken配一個利慾熏心嘅資本家）——布嘉文（Louis Gossett Jr.飾演）
（男女主角嘅老細，自高自大嘅光頭黑人企業家，為咗賺錢同保住自己喺海底王國嘅資產作出咗超多愚蠢嘅決定）
P.S.：實在唔知點評價TVB嘅翻譯好，哩個角色明明同男主角一家冇血緣關係，係都要譯佢姓布。

招世亮——布肖恩（John Putch飾演）
（男主角細佬，本作應該係大學生，考完試嚟探大佬期間同海洋世界滑水隊女隊員相戀，又克服咗細個畀鯊魚襲擊而唔敢落水嘅陰影）

蔡惠萍——卜佳莉（Lea Thompson飾演）
（男主角細佬條女，海洋世界滑水隊隊員，喺公園開幕當日不幸被大白鯊母鯊襲擊並且咬傷大肶）

張炳強（退行）——積（P. H. Moriarty飾演）
（英國貴族攝影師嘅助手，為老細效力多年而且彼此感情好好）

沈小蘭——莉（Liz Morris飾演）
（台詞讀成“麗莎”，女主角下屬女助手，幫女主角一齊飼養同訓練海洋世界嘅哺乳動物）
P.S.：雖然唔係絕對確定（準繩度65%）本角色由沈小蘭聲演，不過對於哥頓聲庫館猜測係李秀儀嘅睇法，本人經過多次對比之後並唔認同。

黎偉明（已故）——丹尼（Dan Blasko飾演）
（女主角下屬男助手，負責控制海豚出入環礁湖閘口嘅開關）

源家祥（已故）——葛（Rich Valliere飾演，演員已故）
（海洋世界對外嘅發言人，負責同媒體接觸，畀老細命令將男女主角捕獲嘅大白鯊幼鯊搬去畀遊客觀賞）

謝潔貞——莎蓮（Dolores Starling飾演）
（男主角失踪嘅下屬條女，先後兩次向男主角抱怨條仔唔知死咗去邊，結果導致男女主角喺水底搵人嘅時候撞到大白鯊幼鯊）

林國雄——歐薛（Harry Grant飾演）
（台詞讀佢嘅姓氏讀成“歐文”，男主角失踪咗嘅下屬，負責焊接海底王國嘅海閘，傍晚潛落水鎖翻被撞開嘅大閘嗰陣畀突然出現嘅大白鯊母鯊咬死）
P.S.：純粹係感覺啲聲談好似，準繩度75%。




影片名稱 大白鯊大報復 Jaws: The Revenge
（全系列最後一部，雖然經歷過第三部嘅口碑撲街之後又將故事大綱轉移翻去布家，不過仍然擺脫唔到全系列至此爛尾收官嘅結局）


首播日期 28/7/1991


重播日期 16/7/1992、27/8/1993、29/7/1994、23/8/1995、?/?/199?/、31/8/2014、16/7/2016、24/7/2022


播放頻道 明珠台


備註 1987年美國電影


配音員 角色名稱 演員

許盈（算係近年嚟可中年可老年嘅熟女聲代表）——布艾倫（Lorraine Gary飾演）
（女主角，男主角阿媽，細仔畀大白鯊咬死之後傷心欲絕，一直認為條大白鯊係專登嚟搵佢哋哩家人報仇嘅）

蘇強文（阿So把聲都幾啱角色嘅外形）——布米高（Lance Guest飾演）
（男主角，女主角大仔，本作已婚仲有埋個女，為咗攞博士學位潛水研究海螺，因此畀擔心大白鯊尋仇嘅女主角強烈反對佢繼續落水）

劉奕希（貓王配啲把口唔識得收嘅黑人效果都唔錯）——傑克（Mario Van Peebles飾演）
（男主角老友，精通電子方面嘅知識，本來齋同男主角一齊研究海螺，但係大白鯊出現之後又說服男主角分一半時間出嚟研究大白鯊）

潘文柏（阿柏配中年嘅米高·堅相當入型入格）——賀基（Michael Caine飾演）
（女主角嘅新男朋友，喺巴哈馬做飛機師，份人雖然爛賭但又夠幽默風趣，令經歷喪子之痛嘅女主角有信心同勇氣重新出發）

吳羨婷（退行）——布卡娜（Karen Young飾演）
（男主角老婆，雕塑藝術家，生咗個女，同老公成日會為小事鬧交不過實際上感情幾好）

曹啟謙——布肖恩（Mitchell Anderson飾演）
（男主角細佬，本作子承父業成為阿美提警署嘅副隊長，聖誕節前夕為咗清理航道上面嘅一碌木樁而被大白鯊襲擊致死）

何璐怡——布茜亞（Judith Barsi飾演，演員已故）
（男主角5歲嘅女，同父母喺巴哈馬一齊生活，平時有同朋友仔去海邊玩嘅習慣，不過嫲嫲嚟到之後哩種愛好開始受到干涉）

何寶珊（退行）——露莎（Lynn Whitfield飾演）
（同男主角老友一對嘅黑人女荷官，好錫男主角個女）
P.S.：據《進擊的巨人》嘅莎夏·布勞斯推測，準繩度55%。

陳永信——加倫（Cedric Scott飾演）
（男主角留二撇雞嘅黑人助手，基本上出親場都戴住頂草帽，鍾意打鼓點）

朱子聰（已故）——威廉（Charles Bowleg飾演）
（男主角另一位黑人助手，基本上出親場都戴住頂cap帽，鍾意睇書）

林丹鳳——寶莉（Edna Billotto飾演，演員已故）
（女主角細仔下屬秘書，一個依然幾長氣嘅白髮阿嬸）

李錦綸——韋（Melvin Van Peebles飾演，演員已故）
（男主角老婆作品揭幕當日向公眾致辭嘅專員，講完嘢之後冇幾耐男主角個女就畀大白鯊襲擊）

劉惠雲——芬妮（Mary Smith飾演）
（女主角細仔嘅未婚妻，喺未婚夫畀大白鯊殺死之後幾乎精神崩潰要打鎮靜劑，葬禮上又喊到收唔到聲）
P.S.：純粹係感覺啲聲談有少少似，準繩度25%。



以下為個人感想，僅供參考：

《大白鯊》系列去到第三同第四部由於劇本質量明顯下降以及預算安排唔合理，口碑同票房比起前兩部都雙雙插水，以至於環球自己都喺《回到未來續集》影射《大白鯊》越拍越差仲要係咁拍。

如果話前兩部《大白鯊》勝在利用懸疑式嘅拍攝手法表現戲裡面鯊魚嘅詭秘同恐怖，後兩部《大白鯊》就直頭係自曝其短，明知鯊魚唔夠逼真仲搞咁多特寫（尤其是第三部嘅大白鯊3D建模簡直生硬到冇朋友）。其中第三部夜戲同水底戲勁多，搞到畫面黑過墨汁，令觀眾實在好難有興趣專心睇。至於第四部，雖然換翻機械鯊魚，但係條大白鯊嘅動作導演你自己唔覺得好假好戇居嘅咩？

影片立意方面，《大白鯊》後兩部已經冇咩特別深刻嘅內涵，不過作為暑期嘅商業大片（第三部同第四部分別喺22/7/1983同17/7/1987上畫），哩方面其實唔係好緊要。不過後兩部衰在劇本太多細節經唔起推敲：首先第三部條母鯊塞住喺過濾泵咁耐竟然唔死（大白鯊一定要保持游動先唔會窒息而死），而且高潮一幕條鯊魚係咁塞個頭入去水底控制室仲要畀男主角鈎中鯊魚口裡面英國佬揸住嘅手榴彈保險實在太滑稽；然後第四部，男主角為咗逃避大白鯊追殺喺水底放氧氣迅速上浮竟然唔會患減壓症（相反第二部就有體現），以及高潮戲大白鯊跳出水面咬住男主角個黑人老友嘅情景同埋大白鯊最後嘅死法（居然會畀船頭碌木杉插死，可能連導演都覺得荒謬所以第四部有第二個結局好似係男主角用老友留低嘅裝置炸死大白鯊）亦都非常違背科學原理。

所以，環球拍到第四部就冇再出《大白鯊》嘅正統續作。而上世紀90年代以嚟出現嘅大多數鯊魚驚悚片評價都唔多掂，只得好少哩類型嘅電影可以稱得上佳作或者質量算係過得去嘅（例如1999年《深海變種》、2004年《鯊海22小時》、2016年《奪命狂鯊》同2018年《極悍巨鯊》等等），搞到今時今日嘅觀眾都唔多睇好鯊魚片。

神之影

全部新配音？

JVT

神之影 发表于 2022-8-14 22:09
全部新配音？

第三部95年重配版，第四部14年三配版

生化之父

为什么第3／4集更换配音员？

snzt

堂哥好似好少配真人主角

JVT

生化之父 发表于 2022-8-14 22:30
为什么第3／4集更换配音员？

其实第三部重配版的配音员跟第二部可以说是颇有关联，堂哥还是配布米高，丽丽从他弟弟变成女朋友，Judy从他妈变成他弟的女朋友，变动不算特别大
至于第四部，估计是因为TVB曾经有大约18年的时间没有播过，期间重配版音轨损坏导致要配第三次

JVT

snzt 发表于 2022-8-14 22:33
堂哥好似好少配真人主角

佢配热血青年多吧？早期啲片比较少青春片所以比较钟意用成熟男性做主角，后期轮到青春片盛行嘅时候堂哥又老啦

我唔食猪肉

又重配版？咁开始果个配音版系点？第四部一听就知系好多00年代入职TXB噶人配，所以有旧版配音唔出奇毕竟电影咁旧。但系开头三部仲有其他配音版？

coolkid

JVT 发表于 2022-8-14 22:11
第三部95年重配版，第四部14年三配版

三配版是什么意思

JVT

我唔食猪肉 发表于 2022-8-15 05:04
又重配版？咁开始果个配音版系点？第四部一听就知系好多00年代入职TXB噶人配，所以有旧版配音唔出奇毕竟电 ...

都系根据资料写咖咋，据资料显示1991-1994年期间播出嘅《大白鲨》系列系首配版，阵容不明不过估计会有黄健强、方焕兰、冯永和、孙明贞、曾庆珏等老一辈配音员献声
从1995年开始，《大白鲨》系列就已经重配成而家大家听到嘅阵容，第四部2014年重播开始更加系第三次配（三配咪即系二次重配咯）